حسيت بروح الشهداء

كنت مع صحابي خارجين و معدين على ميدان التحرير

لقيت نفسي فجأه سكت و بطلت تهيس و بطلت أغنى مع الاغنيه معاهم
حسيت بجد بروح الشهداء  

و سكت احتراما لهم

يا رب ارحم شهدائنا
 

يوم ما افتكرنا ان احنا خِلصنا

 11/2/2012 

يوم ما افتكرنا ان احنا خِلصنا.. و لملمنا حاجتنا و قلنا خلاص.. خَلٌصنا
يعيد اليوم يومه و نرجع و نقول يا ريتنا


يا ريتنا ما مشينا و سبنا ورانا العسكر يحكمنا

 قلنا ما أي حاجه احسن من حاكمنا ..بس طلعنا مش فاهمين .. مش عارفين
 ان الكلب له ولاء لسيده حتى لو الموت أخده منه

رجعنا و قلناا .. اضراب .. عصيان 
 و حياتك يا بلدي غلطنا في حقك لما مشينا
لما جرينا مستعجلين و قلنا احنا جامدين
ثوره في 18 يوم .. محدش عمره يعملها

جالنا فتره غرور.. فتره ثقه.. قلنا احنا جيل عمر ما حد يهزمنا

ساعتها فرحنا بعَلمنا .. و تلاقي البيوت في البلكونات عارضينه

و دهنا كل حاجه أحمر في أبيض في اسود.. و نزلنا و نضفنا شوارعنا

و قلنا و حياتك يا بلدي لنبنيكي... و نجيب حق شهيدك اللي ادانا من دمه حريتنا

بس العسكر مش راضي.. على القوه اللي بقوا فيها ولاد بلدي

قال و حياه مبارك لخلي .. الشعب يندم على الثوره

و حياه مبارك لأبقه أقوى من ولاد بلده .. وان شا الله تموت فيها .. بلده

ولخلي اليأس يعشش في النفوس.. و الاحباط يبقه ده العادي

أقتل .. أدهس.. أعري .. أعذب.. أسجن... المهم متقوملوش قومه 

و يا نا يا هوا

بس الشعب طلع واعي .. طلع فاهم .. و عرف غلطه 
غلطه لما ساب حلمه ..حد غيره يكمله

الشعب نزل و قال .. يا عسكر يا خاين 
 خليت لكل بيت شهيد .. خليت لكل بيت سجين
 خليت لكل بيت أزمه اسمها العسكر.. خليت فيه تار بينا و بينك

طب و حياتك يا بلدي هنفضل نجاهد لحد من نشوفها من غير عسكر
بس مش عايزين يبقه همنا بس العسكر.. عايزين نتعلم من غلطنا

همنا يبقه كل ظالم يحاول يقتل في بلادنا..يدبح في ولادنا
 لأن الظلم مش انسان .. بموته يختفي الظلم

الظلم كيان .. يتلبس في 100 انسان.. و احنا وراه .. و مش هنبطل نجيب أخره

احنا الشعب .. و بأدينا و وحدتنا ..كل شيء بيتغير

مجزره بورسعيد

مبدئيا كده مينفعش نقول عليها أحداث بورسعيد عشان ديه مش " أحداث" .. ديه مجزره يعني ايه 72 واحد يموت في ساعه

انا مش قادره اتكلم في الموضوع ده خالص .. انا بقالي يومين بعيط و كنت يوميها قاعده مستنيه القطر يوصل و الاهالي بيستقبل عيالها مش عارفين اذا كان مصاب ولا ميت ولا جراله ايه  و مناظرهم تصعب على الكافر

تعبانه بجد نفسيا من اللي بيحصل !.. لأول مره في حياتي من كل الاحداث اللي بتحصل في مصر.. اول مره احس اني عايزه أهاجر و اسيب ام البلد ديه اللي دمنا فيها رخيص أويييييييييييييي أوي أوي

قرفت

يا رب ملناش غيرك !!.. ورينا غضبك على الظلمه القتله اللي في بلدنا

يا رب احنا بنحاول نعمل اي حاجه لبلدنا !!.. و بنحاول نبقه ايجابين 

بس ده مش عاجب ولاد الكلب اللي حاكمينا 

يا رب دوله العدل كل اللي احنا عايزينه 

يا رب مش عايزه لما اكبر اقول لولادي اسباب فشل الثوره 

نفسي  البلد تنضف !!!.. يا رب

لأول مره كده مستاءه و مكتئبه بشده

يا رب خليك معانا

العسكر أولا يا جدعان

النهارده كان يوم 27/1/2012
طلعنا بمسيره من مصطفى محمود للميدان .. المسيره كانت تحفه بجد و كنا كتير أوي و كانت الروح حلوه أوي ..جينا نخش الميدان لقينا الاخوان معليين صوت القران عشان الهتاف بتاعنا ميتسمعش و حاطين 17 ميكرفون .. 17 ده رقم حقيقي
و مشغلين القران بصوت عالي أوييييي و يقولوا للناس ايه.. اسمعوا للقران و انصتوا !!

وحيات أمك؟؟؟
ده اسمه ايه ده انا مش فاهمه !!.. انت هتحجر على صوت الناس و كمان باستغلال القران !! عشان لو حد عارض يبقه ايه ده عيب مش عاجبه القران ؟؟
استغفر الله العظيم بجد مستفزيييين


لا و ايه قالوا هنصلي المغرب و بتاع
الصلاه عندهم كانت انهم صلوا تقريبا بربع حزب في الركعه و قعدوا يدعوا كتير اوي في الركعه الاخيره
من امته في الميدان واحنا بنصلي بكتير اوي كده؟؟؟..ده احنا دايما كنا بنصلي بقصار الصور

تقريبا صلوا المغرب في نصف ساعه

ايه الاسلوب الزباله ده !!..كل ده عشان يسكتوا الناس؟

المهم الناس مسكتتش و قعدت تهتف جامد أوي ضد الاخوان
و انزل انزل
بيع بيع بيع .. بيع الثوره يا بديع
ديه ثوره .. ديه مش حفله

و لأول مره بقالي فتره مشفتهاش في الميدان .. ان الناس كلها تتجمع لهتاف واحد
انا قاعده بتفرج على الناس .. فيه منهم الكبار و الستات اللي بعبايات و فيه منهم ملتحين و كل انواع الشباب و البنات و عائلات باطفالهم

يعني محدش يقلي قله مندسه و شويه شباب همج

الفكره بقه اني مهتفتش ضد الاخوان .. و انا فخوره بده
مع اني متغاظه منهم جدا و نفسي امسك في زماره رقبتهم من ايام محمد محمود
وطلعت بعدها على ماسبيرو

بس الفكره انا عارفه كويس اوي انا نازله ليه ؟؟
انا نازله عشان اهتف ضد الاخوان ولا العسكر

نفترض ان الاخوان دول كاكا يا سيدي ..حاجه اخر زباله
نهتف ضدهم و نعد نتخانق بقه و بتاع و نسي اللي احنا اصلا نازلين من بيتنا عشانه

أظن لأ

و اعتقد ان الاخوان بعد الدرس اللي اخدوه ده يتعلموا يحترموا الناس و الميدان مش ليهم لوحدهم ده للشعب كله ..و شافوا غضب الناس عليهم من كل الاطياف لما حاولوا يحجروا و يكتموا هتاف ناس في الميدان

المضحك بقه ان بعد ما برضه مش عارفين يسكتوا الناس ... راحوا قعدوا يهتفوا ضد العسكر لول :)
يا واد يا جامد

صباح المياعه يعني بجد
المهم مش موضوعنا الاخوان .. العسكر أولا يا جدعان

وصيتي

عارفه ان ان شاء الله بكره 25 مش هيحصل حاجه ولا ضرب و كده
بس برضه حبيت أكتب وصيتي

أنا عايزه لبسي يتوزع على الناس الفقراء كل لبسي و جزم و كل حاجه

لو ليا أي فلوس في الورث أو الشقه أديها للفقراء
 

أنا عايزه اتبرع بعينيا الاتنين و بأعضاء من جسمي لمصابي الثوره

عايزه أهلي و صحابي يحاولوا يجمعوا أكبر عدد ممكن من الناس تصلي عليا

مش عايزه حد يصوت عليا ولا يعيط جامد و الكلام ده

عايزه تفتكروني دايما بالخير

عايزه تعملوا جروب تخشوا كل يوم تدعولي و تفكروا الناس انها تدعيلي و مش لازم جروب ليا لوحدي يبقه لكل الشهداء و الناس تخش تدعيلهم كل يوم

مسامحه كل حد ممكن يكون ضايقني و ياريت أي حد مضايقاه يسامحني

كلاكيت ثوره تاني مره

لأ مش هعلقها دلوقتي أصلها لسه مخلصتش

كنت بعد الثوره بيومين جبت فرخ لوح و رسمت حاجات عن الثوره و كتبت الشعارات اللي كنا بنقولها و حطيت صور الشهداء من جورنان المصري اليوم عشان كنت شايفه ان الشهداء دول لازم يفضلوا قدامنا علطول و مننساهمش أبدا.

رسمت و لزقت الصور و لونت  بس بقيت حته كده في اللوحه لسه فاضيه و مخلصتش اللوحه ..و أي حد يجيلي البيت من صحابي أفرجهم عليها و يقولولي الله ديه حلوه أوي علقيها.
كنت برد عليهم بالرد ده
" لأ مش هعلقها دلوقتي أصلها لسه مخلصتش"

كنت فاكره ان ناقص اللوحه شويه كلام تاني عن الثوره و تبقى خلصت ..مكنتش فاكره أبدا ان فعلا اللوحه مخلصتش عشان الثوره أصلا مخلصتش.. عشان فيه شهداء تاني لسه المفروض أحطهم جنب شهدا يناير..عشان برده أفتكرهم و منسهامش طول حياتي..لسه فيه أحداث كتير حصلت و بان فيها مواقف الأحزاب.. لسه فيه حاجات كتييير أوي محتاجه أغطي بيها الأوضه ألواح عشان أحكيها


أفتكرت اللوحه ديه النهارده.. طلعتها
 كنت حاطه في اللوحه حبه صور و حبه هتافات من اللي كنا بنقولها في الميدان

 !!لقيت صوره الدبابه و ظابط الجيش اللي بيلم على الناس و الناس ببصور معاه
لقيت في الهتافات اللي كتباها .. الجيش و الشعب أيد واحده

أحساس جوايا اني عايزه أقطع الصوره ديه و أشخبط على الهتاف ده
 :S:S
 حاجه تحزن و الله

 قعدت أبُص في اللوحه و أضحك على نفسي و كأني بقول لنفسي ..ياااه ده احنا اضحك علينا أو بمعنى تاني .. ضحكنا على نفسنا لما افتكرنا ان كده خلاص عملنا اللي علينا في ال 18 يوم و هدمنا الفساد
احنا اهو فاضل 28 يوم على عيد الثوره و الحاله زفت..(اللي الحكومه طبعا مش معترفه بيه)
اصلها بعيد عنكوا كده مش حكومه ثوريه ..مش عارفه ازاي

و عشان كده و عشان حاجات كتير أوي هننزل تاني يوم 25 يناير 2012
و هنهدم أم الفساد ده اللي متوغل في البلد ديه
و يا احنا يا هوه بقه

و على رأي وائل غنيم .. احنا اللي هنحبط الأحباط
ممكن نخلي ده شعارنا بجد في الفتره ديه

تسليم السلطه لرئيس مجلس الشعب
محاكمه قتله ماسبيرو و محمد محمود ومجلس الوزراء و المسؤول الأول عنه المشير طنطاوي و سامي عنان
مش عايزين محاكمات عسكريه لمدينين
الافراج عن معتقلي الرأي اللي في السجون و اللي محكوم عليهم عسكريا بعدد 12,000
تطهير القضاء و ده مهم فحت

هنرجع لل 3 حاجات اللي نزلنا بيهم أول يوم
عيش..حريه ..عداله اجتماعيه

تحديد حد أدنى و أقصى للأجور..و تحت حد أقصى ديه 60 ألف خط
حريه الرأي و التعبير تكون مكفوله لكل الناس و احترام كرامه الانسان المصري و حرمه جسده و (عرضه)و الالتزام بالقانون في التعامل مع المتظاهرين

فيه سؤوال يراودني بشده ..هوه الأخوان المسلمين بجد راضين عن نفسهم كده ؟؟..و طبعا هما لحد دلوقتي مأعلنوش انهم هيشاركوا في 25 اللي جايه !!..
أنا مش عارفه ايه الغرور اللي هما بقوا فيه ده ..هما فاكرين نفسهم انهم اللي نجحوا الثوره ؟؟..الثوره أولا منجحتش و لو نجح الجزء الأول منها ده بقه بسبب ربنا و  بعده المصريين جميعا

و لو الاخوان فاكرين ان هما اللي عملوا الليله ؟؟..طب مهما مرزوعين في مصر من 1928 معملوش ليه ثوره بقه ؟؟..و كان ساعتها محدش قدر يفتح بقه معاهم....

!!يبقه يتتكتموا بقه مش كل شويه يعدوا يقولوا احنا اللي حمينا  الثوره و احنا اللي هببنا..يا عم عيب عليكوا ده انتوا حته مستجرتوش تنزلوا في أول الثوره
انا مكنش ده رأي ابدا عنهم .. بس الأحداث عماله تثبتلي كده و أعلامهم المخزي عمال يثبت ده أكتر و اكتر سواء من جورنان أو من قناه 25

المهم دلوقتي ان الثوره ديه يا جدعان هتنجح غصب عن أي حد ان شاء الله .. يا رب خليك معانا يا رب

لسته العريس :P

احم احم 
بصوا بقه رفيق الكفاح ده لازم يبقه فيه شويه حاجات كده مهمه !!:]


أيام الثوره كان عندي لازم يبقه كان بيبات في التحرير على الأقل 3 أيام


دلوقتي بعد أحداث محمد محمود و مجلس الوزراء الموضوع أختلف حبتين 
:D :D هعع

1)طبعا لازم يكون نزل أيام الثوره و بات في التحرير

2)يكون متأثرش بخطاب مبارك التاني ولا عيط ولا الحركات النص كم ديه

3)يكون نزل موقعه الجمل

4)يكون  عمره ما نزل مظاهرات في العباسيه ولا هوب نحيتهم

5)يكون شملوا حبه حلوين من غاز محمد محمود بمقدار مثلا 3 أيام نزول بحد أدنى . و طبعا يكون شم من النوعين

6)يكون أعترض على أحداث مجلس الوزراء و نزل وقف قدام العسكر الأوباش

7)ميكونش قال على البنت اللي اتسحلت و اتعرت.. هي ايه اللي نزلها ولا هي ليه مش لابسه حاجه تحت العبايه

و جاري تحديث البوست ده على حسب اي حاجه جديده تحصل في الثوره اللي مش باينلها اخر ديه :D

يا خوفي :D

و طبعا النقط ديه فوق معتقداتي الأولييه عن الشخص اللي هكمل معاه حياتي (A)(A)


حاسه هاخد فوق دماغي في الاخر
(H)(H)