مله أهلكوا ايه ؟؟

انا مش لاقيه حاجه أقولها عن الاوسااااخ دول !!
!!..جيش و شرطه ولاد ستين كلب

و ربنا ياخد كل واحد قتل واحد من المتظاهرين و عذبهم
ربنا على الظابط و العسكري !!

انا مش عارفه أتكلم تعبت من الكلام
دهس و سحل و تعريه و قتل و ضرب !!! ايه بقه !!..مله أهلكوا ايه تعرو بنت و تضربوها بالطريقه المريضه ديه !!.. و تضربوا اللي
تيجي تساعدها بعد كده !!!.. و يسحلو ستات كبيره في السن و يضربوها

 البنت ديه قالولها طنطاوي ده سيدك !!   

  و حفرو حرف

T

على راسها أول حرف من طنطاوي الكلب !

تقتلوا الطفل و الشيخ و الأزهري و الطبيب و المهندس و خريج الاعلام !!
هما دول البلطجيه في وجهه نظركم
 !!

كل اللي اقدر اقوله !!.. حسبي الله و نعم الوكيل !!
الله أكبر و أعلى من الظابط و العسكري و كل ظالم فيكي يا بلد

و الله لننظفك يا بلد من ولاد الكلب دول

روحي هناك

"مش موافقه تنزلي التحرير يا سارة!!.. سامعه؟"

لأول مره ماما تقولي كده !!!.. نعم بقه!!..ده أنا كنت موجوده في موقعه الجمل و كنت موجوده في أسبوع محمد محمود  و بخش أساعد الناس لحد نص محمد محمود!!..مع علمها بالكلام ده كله و كانت بتكلمني و أنا في الطريق للتحرير و تقلي جددي نيتك لله يا سارة!!.. أشمعنى المره ديه ؟؟!!.. 

عرفت ليه طبعا !!.. عشان صوره البنت اللي اتعرت واجعاها !!.. و كل ما تفتكرها تُعد تعيط !!..متخيالاني مكانها

"لأ يا ساره لازم نهده بقه شويه كده و  ننزل  لما نبقه كتير و يبقه فيه نظام أنا مش مستعده تتاخدي و يحصل فيكي كده " 

يا ماما يا حبيبتي ماهما عايزين كده ان احنا نطاطي و نخاف !!.. و احنا مش هنخاف ابدا تاني بجد و لو مجبناش حق البنت ديه و حق الشيخ عماد و حق كل الشهداء و كل البنات و الستات اللي حصل عليهم انتهاكات .. يبقه منستحقش نعيش رافعين راسنا .. يبقه منستحقش نفرح أصلا  

و بعدين من امته يعني يا ماما؟؟.. ده انتي الام الشجاعه اللي بتفشخر بيها قدام كل صحابي انها بتوافق انزل و مبتعترضش و واثقه ان انا مكتوبلي هموت امته و ازاي !! 

المهم .. نقاش طويل طويل طويل بتكلم مع أمي و أخويا و مش راضيني أنزل !!!.. لقيت نفسي فجأه بعيط أوي !!.. بقول احنا بنتكلم في ايه !!.. الناس ديه لازم يتجاب حقها !!.. انا لازم اشارك في ده !!!.. و يحصلي اللي يحصلي بقه !!و لقيت نفسي بعيط جامد أوي اني مش هنزل التحرير .. دخلت عيطت شويه مع ان انا دمعتي أصلا نادره أوي ..و بيسموني معندهاش دم :]

رجعت تاني و احاول اتناقش تاني و تالت .!!.. لقيت مش موافقه برده !!..لقيت نفسي بعمل تصرفات خارجه عن ارادتي !! لقيت نفسي بخبط في الأرض .. و الدمع عماله تنزل علي خدي من غير اي احساس ولا تحكم فيها !!.. و قلتلها لأ ماهو مينفعش منزلش !!!.. مينفعش!!..

قلتلي يا ساره لو نزلتي انا مش راضيه عنك !!!!!

الصدمه !!

رحت شديت شنطه صاحبتي ساره و شنطتي !!.. يلا يا ساره 
أنا نازله يا ماما 
و جوايا صوت بيقولي ان انا نازله أقول كلمه حق في وجه سلطان جائر
و ان انا صح


نزلت بسرعه على السلالم و مشدتش الاسانسير عشان محدش يلحقني


صوت أخويا بيزعق 
سااااااااااره
تعاليييي 


صاحبتي وقفت قدامي و قلتلي ساره انتي عايزه تعملي فضايح في العماره ؟؟!!...و بعدين انتي هتنزلي و أمك مش راضيه عنك؟؟ ..ديه مش حاجه كويسه ابدا !!




رجعت و دخلت البيت و انهرت في العياط بطريقه مش طبيعيه !!!
صاحبتي كلمت واحده صاحبتي تانيه عشان تيجي تهديني و يخرجوني شويه من اللي فيه !!.. للدرجه ديه كانت حالتي خطيره ؟!! :] انا فعلا مكنتش حاسه بنفسي الدموع كانت بتنزل من غير ما احس عماله تنهمر و مقهوره من جوايا أوي أوييييي


صحابي خرجوني شويه طول ما انا قاعده ..مخنوقه .. و كل شويه أسأل صاحبتي اللي قاعده على تويتر .ز ايه أخبار الناي اللي في التحرير؟؟..كتير؟؟...طب الستات اللي في المسيره ؟؟.طب طلاب جامعه عين شمس؟؟..الناس كتيره؟؟


أول ما توريني صوره ان الناس كتير 
أعُد أقول الحمد للهههههههههههههه !!!!!..
كأني ولدت ولد ولا كسبت مليون جنيه ولا حاجه :]:]


و أفرح لما أسمع الكلام ده !!.. و أرجع أتحسر على حالي عشان مش معاهم 


أيقنت ساعتها ان روحي  مكنتش معايا !!..روحي هناك !!.. روحي في التحرير !!  


يا رب عديها على خير و خلصنا من أم مجلس العار ده والله ان شاء الله النصر قريب

هتاف و بكاء

هتاف و بكاء !!!!..ده اللي كان بيحصل امبارح السبت 17/12/2011
قبل الصلاه على الشهيد الشيخ عماد الدين عفت 



بعد ما صلينا الظهر قعدنا نهتف بحرقه يسقط يسقط حكم العسكر..لا اله الا الله .. الشهيد حبيب الله.. الشعب يريد اعدام المشير ..و في نفس الوقت كنا بنبكي لاستشهاد الشيخ عماد مع اني معرفوش بس حسيت اني اعرفه اوي و كأنه اتاخد مني و كنت حزينه عليه أوي كأني عارفاه كويس...كان هتاف بحرقه يصحبه بكاء

امام المسجد كان بيسكتنا كل ما نهتف و اخيرا راح مسكتنا بقراءه القران.. فيه ناس مسكتتش و قعدت تهتف برده في الساحه بس انا استحيت بصراحه و قلت لأ انا هعُد


المهم جه جثمان الشيخ الكريم و الامام (عرفت بعد كده انه على جمعه)


قالنا اسكتوا و اقعدوا  و اسمعوا.. قعد بقه يتكلم شويه عن الشيخ و بعدين راح قال لا نعرف من قتله :'( :'(كنا في الساحه أصلا بعد ما قال كده راح كلنا هيجنا بقه جامد اوي و قلنا يسقط يسقط حكم العسكر و دخلنا مكان المصلى ناحيه الامام و قعدنا... نهتف و نعيط و بعدين جيه شيخ أزهر ..الشيخ أنس السلطان ربنا يكرمه يا رب.. راح طلع هو وهتف الشعب يريد اعدام المشير و يسقط يسقط حكم العسكر..اول ما قال كده بقينا بنعيط جامد أوي من حزننا و بنهتف بحرقه شديده !! فرحنا قوي بيه بقه عشان شيخ أزهر يعني و قعدنا نهتف و نعيط تاني ;'( مش مصدقين الازهر بيعمل ايه !!!!! :S:S:S: كنا متوقعين منهم حركه او اي موقف ضد المجلس بعد ما اللي حصل لكن للأسف كان موقفهم مخزي:S

راح الشيخ على جمعه أوقفنا ببدأه للصلاه..صلينا العصر و بدين جه وقت صلاه الجنازه ..بعد الصلاه عليه .ستات كبار جنبي هما اللي بدأوا الهتاف.. يسقط يسقط حكم العسكر
و الناس كلها وراها و بعدين طلعنا بمسيره من جو الساحه لبره .. المسيره متوجه أولا لدفن الشهيد و بعد كده على التحرير


و احنا في الطريق عند السيده عيشه كده و بنشاور للناس اللي في العمارات ..يا اهلينا انضموا لينا .. لقينا ترحيب من الناس اوي .. و لقينا ست كبيره في البلكونه بتهتف بحرقه يسقط يسقط حكم العسكر ..فرحنا أوييي  و قعدنا نهتف وراها و سقفنالها وقعدنا نصفرلها بقه :]

  رحنا الدفنه و الشيخ أنس قالنا نصمت و ندعوا للشيخ تلت ساعه و بعدين مسيره للتحرير..عملنا كده فعلا عدينا على ميادين كتير واحنا في الطريق و اللي يقلك"ربنا يبارك فيكوا يارب انتوا انضف ناس في البلد" واللي يصقفلنا و يحينا و على الجانب التاني .. الي بيشاوروا لينا بحاجات و حشه و يشتمونا و "خربتوا البلد و بتاع "
عادي جدا كنا بنسكت و منردش عليهم ..و اللي بيتنرفز و عايز يروح نحيتهم يتخانق .. الشباب بيمسكوه و يهدوه 





والله نفس الروح بتاعه ايام الثوره الاولانيه و نفس الشباب معظمهم مش مسيسين و لا في أحزاب بقه ولا أي بتنجان ..مش فاضين طبعا عندهم أم الانتخابات  أهم من الدم اللي راح و من الشرف اللي راح


المهم قربنا من الميدان و أحساسي كأني راجعه بيتي و قربت أوصل كل ما نقرب
كل ما نقرب الميدان الهتاف بيزداد حرقه ..أول ما وصلت المسيره لقينا تشجيع جامد اوي بيحيونا عشان كنا كتير 


ثوار ..أحرار.. هنكمل المشوار
حريه ... حريه ...حريه
الجبان جبان و الجدع جدع واحنا يا جدع راجعين الميدان

هتافات قلناها بحرقه و بشده و بفرح من تجمعنا تاني بعد ما الصبح الميدان كان مفهوش حد خالص ..الجيش كان دخل الميدان و حرق
الخيام و فض الاعتصام بالكامل


حسبنا الله و نعم الوكيل في كل ظالم
يسقط يسقط حكم العسكر


لازم بقه الناس اللي في البيوت و اللي بتقول دول بلطجيه و .. يذكروا الحديث ده

 حديث رسول الله صلى الله عليه وسلم
عن كعب بن عجرة قال : خرج علينا رسول الله صلى الله عليه وسلم ونحن تسعة وبيننا وسادة من أدم أحمر , فقال : إنه سيكون بعدي أمراء فمن صدقهم بكذبهم وأعانهم على ظلمهم فليس مني ولست منه ولن يرد على الحوض , ومن لم يصدقهم بكذبهم ولم يعنهم على ظلمهم فهو مني وأنا منه وسيرد على الحوض.

الشهيد الشيخ عماد عفت

و احنا قاعدين في محاضره الدكتور أسامه اللي عاملاها معرفه .. فجأه لقينا واحد بيقول ان الشيخ عماد عفت أخد رصاصه في أحداث مجلس الوزراء ..
انا معرفش مين الشيخ بس لاقيت الشيخ أنس سلطان خرج بره بسرعه و كأنه بيبكي .زو بعد شويه رجع و حكلنا حاجه أثرت فيا جدا خلتني أعد أعيط بعد ما مشيت عياط غريب..الشيخ أنس كتبها بعد كده على الفيس بوك
 أهي

ليوم الجمعة 16-12-2011م بعد صلاة الفجر جلست للقراءة قليلا ثم نمت فوجدتني أبكي بشدة وترتعش أطرافي ولا أستطيع تمالك أعصابي وأقول في نفسي أريد لقاء شيخي الشيخ عماد عفت فورا لأضمه وأقول له اشتقت لك يا شيخي ثم وأنا في هذا البكاء الشديد إذ بهاتف يهتف بي : أتبكي شوقا لشيخك ولا تبكي شوقا لرسول الله (صلى الله عليه وسلم)؟؟!! ف...استيقظت لأجد خدي مبللا بدمعي الغزير على الحقيقة وبقيت طوال اليوم أقول لنفسي : هل أرسل رسالة للشيخ عماد أحكي له فيها ما رأيت أم ماذا أفعل؟ ثم بعد الخطبة كانت عندي محاضرة ألقيها بجامعة القاهرة فحكيت نصف الرؤيا للحاضرين ثم توقفت وقلت لهم لا يحق لي الإكمال إلا أن أسأل شيخي ، ثم بعد العشاء ذهبت للاستماع إلى محاضرة وحكيت لثلاثة من أصدقائي قبل المحاضرة بالرؤيا كاملة ، ثم أثناء المحاضرة جائنا خبر استشهاد الشيخ عماد عفت فقام الحاضرون إلى هواتفهم يتصلون للتأكد من الخبر وانفجرت أنا في البكاء فلا حاجة بي للتأكد منهم فقد فهمت الآن معنى رؤياي في الصباح هنا تذكرت قول رسول الله صلى الله عليه وسلم :(من أصابته مصيبة فليتذكر مصيبته فيّ) وتذكرت قول رسول الله صلى الله عليه وسلم : (إن الله لا يقبض العلم انتزاعا ينتزعه من صدور الناس ولكن يقبض العلم بقبض العلماء حتى إذا لم يبق عالما اتخذ الناس رؤوسا جهالا فسئلوا فأفتوا بغير علم فضلوا وأضلوا) ....... وتذكرت سيدي وشيخي وتاج رأسي الشهيد البطل المجاهد سليل نسل رسول الله الشريف عماد عفت الحسني حين سألته يوما بعد درسه للفقه الشافعي بالجامع الأزهر قلت له يا مولانا ماذا أفعل وأنا لا أجد شيخا ألازمه فيسلك بي الطريق إلى الله فقال : عند فقد المربي فعليك بالصلاة على النبي صلى الله عليه وسلم. رحمك الله سيدي الشيخ عماد فما عرفتك منذ سنين إلا مجاهدا ثابتا أحسبك من المخلصين ولا أزكيك على الله فاشفع لي يا سيدي عند جدك سيدنا رسول الله علِّى ألحق بك ثابتا على دربك ودرب الحسين شهيدا في سبيل ربي اللهم اجعل حياتي دعوة وموتي شهادة .... تلميذك ومحبك أنس السلطان الأزهري الشافعي

ربنا يرحمك يا شيخ

ازاي نتعامل مع الأزمات؟؟

 سلام عليكم  =)

ديه كانت محاضره معرفه عملاها و جايبه  الشيخ أسامه السيد الأزهري

قال كلام أكثر من رائع و قد ايه العلم ده كله عنده ما شاء الله..و ديه أصلا كانت أول مره أحضر محاضره يديها شيخ أزهري و الحقيقه أستفدت جدا و نفسي بقه الأزهر يبتدي يظهر بقوه للشعب كده و يبهرنا بمحاضرات يحضرها الناس العاديين مش أزهريين بس

بدايه المحاضره كان الشيخ بيتكلم عن ان للأسف الناس أختزلوا سنن النبي عليه الصلاه و السلام في سنن الصلاه و المسواك و نُسيت سنن معيار اختيار الولاهو القضاه و سنن المواقف و التمويل و المنهج الاقتصادي

هتكلم بقه في الحاجه اللي قالها و جت على الجرح أوي

ازاي نتعامل مع الأزمات؟؟

يَا أَيُّهَا الَّذِينَ آمَنُواْ إِذَا لَقِيتُمْ فِئَةً فَاثْبُتُواْ وَاذْكُرُواْ اللَّهَ كَثِيرًا لَّعَلَّكُمْ تُفْلِحُونَ(45)وَأَطِيعُواْ اللَّهَ وَرَسُولَهُ وَلاَ تَنَازَعُواْ فَتَفْشَلُواْ وَتَذْهَبَ رِيحُكُمْ وَاصْبِرُواْ إِنَّ اللَّهَ مَعَ الصَّابِرِينَ(46)وَلاَ تَكُونُواْ كَالَّذِينَ خَرَجُواْ مِن دِيَارِهِم بَطَرًا وَرِئَاء النَّاسِ وَيَصُدُّونَ عَن سَبِيلِ اللَّهِ وَاللَّهُ بِمَا يَعْمَلُونَ مُحِيطٌ(47)

سوره الأنفال

ايه الايات ديه ؟؟.. 

  هقولكم حاضر نشوف بقه ربنا بيعلمنا ازاي 

لما يبقه فيه أزمه في البلد او فيه حرب أو فيه ثوره و كل الناس هايجه و مايجه و فيه تخبط كده و حاله خوف و هلع بيحصل للأنسان حاجه أسمها  صدمه المعرفه !!.. ايه الكلام الكبير ده !! :]

لأ كلام بسيط جدا و هو لما الواحد يتفاجأ بحاجه مكنش متوقعها ابدا ..حدث مفاجيء لم يخطر على بال أفقدني التوازن و أدى الي عوارض نفسيه تشوش على عقل الانسان و لا تدعي له أي فرصه للتعقل و وزن الأمور

ديه أول حاجه بتحصل للأنسان لما يحصل أزمه 

طيب ايه الحل ؟؟.. الحل في الايه الكريمه :]

يَا أَيُّهَا الَّذِينَ آمَنُواْ إِذَا لَقِيتُمْ فِئَةً فَاثْبُتُواْ

   

1) فاثبتوا  : الثبات و هو الخروج من حاله الفزع و الهلع و التخبط حتى نرجع لحاله من سكون النفس حتى نسمح للعقل للتفكر و الخروج من الأزمه. فيجب الثبات أولا و اخراج الناس من صدمه المعرفه و ايقاف فوري للصدام و التذكير بالمقاصد العليا (اللي هيا أهداف الثوره أصلا) وخروج الناس من المقاصد الفرديه (اللي هيا الطلبات الفئويه لكل فرد) و ابراز الحكماء المجمعين عليهم لاستشارتهم , يبقه نثبت كده و نهدى عشان نعرف ناخد قرار صح..اللي بيعرف يعمل كده قليلين جدا و هم اللي تتسم فيهم صفه القياده..سيدنا عمر نفسه معرفش يعمل كده لما سيدنا محمد ص توفى أشهر سيفه و قال : من قال ان محمدا قد مات فسأقطعن رأسه !!.. لكن سيدنا أبو بكر كان موقفه ايه .. قال من كان يعبد محمدا فان محمد قد مات و من كان يعبد الله فان الله حي لا يموت .

الثبات هو بدء الطريق للنصر..فأثبت الفريقين أغلبهما.

اللي عايزين نقوله يعتي ان الثبات و اخراج الناس من صدمه المعرفه ده اهم حاجه.

  2)

  وَاذْكُرُواْ اللَّهَ كَثِيرًا     الدعاء بحرقه و الابتهال لله و الرجوع اليه.

3)

  وَأَطِيعُواْ اللَّهَ وَرَسُولَهُ  التوقف الفوري لكل مظاهر المعصيه في المجتمع.

4)
   وَلاَ تَنَازَعُواْ فَتَفْشَلُواْ و ديه بقه مهمه جدا .. ان نعد بقه ننتخانق .. الثوار بنهم و بين بعض يتخانقوا ..طب ما الخناق ده اصلا اول حاجه تخلينا نفشل و نبقه ضعاف لكن لو كلنا ايد واحده هننجح نجاح مبهر ذي ما عملنا في 25 يناير كان كله مجمع على حاجه واحده و أسقطنا نظام المفروض انه قوي بائد أسقطناه في 18 يوم بس !! لأننا كنا ايد واحد بمعنى الكلمه مكنش فيه تنازع فنجحنا لكن اللي بيحصل دلوقتي من المسيسين و الاحزاب و بعض الثوار ..أضعف الثوره قوتها و أطفأ لهيبها مع استمرار الضحايا.

5)
  وَاصْبِرُواْ إِنَّ اللَّهَ مَعَ الصَّابِرِينَ و هذه المعيه من الله  الضمان للصابرين بالفوز و الفلاح..و ديه باينه جدا طبعا لو هنشوف وضعنا الحالي .. اللي بيلعبه معانا المجلس و ماتبقى من النظام الفاسد .. هو لعبه طول النفس فلازم نصبر شويه و ربنا هينصرنا ان شاء الله.



6)
وَلاَ تَكُونُواْ كَالَّذِينَ خَرَجُواْ مِن دِيَارِهِم بَطَرًا وَرِئَاء النَّاسِ وَيَصُدُّونَ عَن سَبِيلِ اللَّهِ وَاللَّهُ بِمَا يَعْمَلُونَ مُحِيطٌ
 يعني ايه الكلام ده !!.. ربنا بيعلمنا و بيقولنا متخرجوش للقتال معجبين بنقسكم و لا متبطرين على الناس بقوتكم !!.. لأ..اخرجوا في سبيل الله .. اخرجوا لحمايه حرمات الناس و حمايه كرامتهم و انسانيتهم و حريتهم.

 

هوه بشار هيتقتل امته بقه ؟؟

بجد نفسي 2011 السنه العظيمه ديه تخلص مع قتل الكلب ده!!

بصوا الفيديو ده!! بصوا الولد ازاي بيقول " الشعب يريد اعدام الأسد" بيقولها بحُرقه غريبه !!..و كل لما الراجل يقاطعه أو يوقفه يعد يهتف تاني بحُرقه أكبر!!.. تستغرب الحُرقه ديه لما تطلع من طفل في السن ده!!.. قد ما هتاف الطفل ده يحرق القلب قد ما يطمنا ان الجيل اللي جاي غير أي جيل!!

الجيل اللي جاي اللي اتربى على الثوره و على عدم السكوت وعدم المطاطيه و اتربى على عدم الخوف هو ان شاء الله الجيل اللي هيعمر بلادنا و هيحرر فلسطين   

كل الشعوب تريد أعدام الأسد الكلب
يـــــــــــارب أنصرهم

البدايه =D

أولا كده أنا قررت أقوم و أعمل نيو بوست و أنا فعلا مش عارفه هكتب ايه ؟؟
حاسه ان فيه حاجات كتير أوي عايزه أقولها .. فيه حاجات كتير جوايا عايزه أطلعها

من زمان و أنا بعشق الكتابه و كل لما أبقى مدايقه لازم أطلع اللي جوايا لأما في الكتابه أو الرقص !!
:D:D
ممكن حد يضحك عليا بس جربوها بس و هتدعولي ..أقفلي باب أوضتك كده و شغلي مزيكا بصوت عالي أوي و سيبي نفسك و سيبي كل الهموم أو طلعي همك في الكتابه

المهم, انا بكتب دلوقتي و نفسي فعلا محدش يقرا الهذي بتاعي ده لأني في حاله نفسيه وحشه أوي .. أنا بس بكتب للزمن ..ذي ما تقولوا كده بكتب مذكراتي ..بس كان نفسي كنت أكتب مذكراني ديه من أول يوم نزلت ميدان التحرير..(يوم موقعه الجمل) حظي حلو أوي صح ؟!!
:D:D
  بحس بالغباء أوي بجد لما ألقي نفس مكتبتش أي حاجه الأيام ديه ولا أتصورت كمان ولا صوره !!ماما نزلت معايا يوم واحد بس أيام 25 و قعدت تقولي هصورك ..و أنا أقولها تصوريني ايه يا ماما هوه أنا جايه عشان أتصور !!!
لوول معلش كنت ببقه محموقه شويتين تلاته ..

بس الحمد لله لما نزلت الأسبوع بتاع 19 نوفمبر كتبت كل اللي شفته
 بس برضو متصورتش !! :D


نفسي بس أولادي أربيهم على عدم العجز و على أنهك يخدوا حقهم و ميسكتوش على حاجه غلط أبدا
 و نفسي أبوهم اللي هيربيهم يبقى ثوري كده برضه أصل الثوري ديه بقت صفه بجد!!

أنا بقيت لما يجيلي عريس بقيت بسأله انت نزلت التحرير ؟؟!! .. مش بيبقوا نزلوا و الأسباب مستفزه ذي مثلا أصل ساعتها مكنش فه أمن !!!!!!

أصل أنا مكنتش ساعتها حاسس ان فيه حاجه هتتغير و بصراحه كان فيه ناس شكلها غريب في الميدان !!

ساعتها ببقه عايزه أقوم و أمشي !!  بس أنا بقه بعد أتكلم عن الميدان طول القعده و ألاقي ماما بتبصلي كده بتزغرني بعنيها :D:D:D

أخرها ..معيد عندي في الكليه و عندي على الفيس بوك..قال لواحده صاحبتي قولي لساره أنها كده هتظفش العرسان منها !! :D لوول :] على أساس يعني اني بكتب معظم الستيتوس عن التحرير و بهاجم المجلس و بتاع !! !!..مش عارفه هما عايزين البنت تبقى بلا أي حاجه .. بلا أي رأي ؟! و متبقاش جريئه و متحمسه و وطنيه بزياده لحسن كده غلط !!.. انا مبعملش غير اللي بحس بيه و في حدود الأحترام


انا عمٌاله أخرج من موضوع و أخش في موضوع :D

أخر حاجه عايزه أقولها أن أنا ساعات بحس أن احنا المفروض منضحكش ولا نفرح لحد منجيب حق الشهداء دول والمصابين دول وميبقاش دمهم راح هدر كده و راح على الفاضي !!..أنا بقيت بيجيلي كوابيس بسبب الموضوع ديه !!.. ايو الله

يلا

يا رب أرحم الشهداء _نحسبهم عندك شهداء يا رب_ و صبر أهلهم و أنزل السكينه عليهم و بعذتك و جلالك يارب أشفي كل مصاب من مصابي الثوره