العسكر أولا يا جدعان

النهارده كان يوم 27/1/2012
طلعنا بمسيره من مصطفى محمود للميدان .. المسيره كانت تحفه بجد و كنا كتير أوي و كانت الروح حلوه أوي ..جينا نخش الميدان لقينا الاخوان معليين صوت القران عشان الهتاف بتاعنا ميتسمعش و حاطين 17 ميكرفون .. 17 ده رقم حقيقي
و مشغلين القران بصوت عالي أوييييي و يقولوا للناس ايه.. اسمعوا للقران و انصتوا !!

وحيات أمك؟؟؟
ده اسمه ايه ده انا مش فاهمه !!.. انت هتحجر على صوت الناس و كمان باستغلال القران !! عشان لو حد عارض يبقه ايه ده عيب مش عاجبه القران ؟؟
استغفر الله العظيم بجد مستفزيييين


لا و ايه قالوا هنصلي المغرب و بتاع
الصلاه عندهم كانت انهم صلوا تقريبا بربع حزب في الركعه و قعدوا يدعوا كتير اوي في الركعه الاخيره
من امته في الميدان واحنا بنصلي بكتير اوي كده؟؟؟..ده احنا دايما كنا بنصلي بقصار الصور

تقريبا صلوا المغرب في نصف ساعه

ايه الاسلوب الزباله ده !!..كل ده عشان يسكتوا الناس؟

المهم الناس مسكتتش و قعدت تهتف جامد أوي ضد الاخوان
و انزل انزل
بيع بيع بيع .. بيع الثوره يا بديع
ديه ثوره .. ديه مش حفله

و لأول مره بقالي فتره مشفتهاش في الميدان .. ان الناس كلها تتجمع لهتاف واحد
انا قاعده بتفرج على الناس .. فيه منهم الكبار و الستات اللي بعبايات و فيه منهم ملتحين و كل انواع الشباب و البنات و عائلات باطفالهم

يعني محدش يقلي قله مندسه و شويه شباب همج

الفكره بقه اني مهتفتش ضد الاخوان .. و انا فخوره بده
مع اني متغاظه منهم جدا و نفسي امسك في زماره رقبتهم من ايام محمد محمود
وطلعت بعدها على ماسبيرو

بس الفكره انا عارفه كويس اوي انا نازله ليه ؟؟
انا نازله عشان اهتف ضد الاخوان ولا العسكر

نفترض ان الاخوان دول كاكا يا سيدي ..حاجه اخر زباله
نهتف ضدهم و نعد نتخانق بقه و بتاع و نسي اللي احنا اصلا نازلين من بيتنا عشانه

أظن لأ

و اعتقد ان الاخوان بعد الدرس اللي اخدوه ده يتعلموا يحترموا الناس و الميدان مش ليهم لوحدهم ده للشعب كله ..و شافوا غضب الناس عليهم من كل الاطياف لما حاولوا يحجروا و يكتموا هتاف ناس في الميدان

المضحك بقه ان بعد ما برضه مش عارفين يسكتوا الناس ... راحوا قعدوا يهتفوا ضد العسكر لول :)
يا واد يا جامد

صباح المياعه يعني بجد
المهم مش موضوعنا الاخوان .. العسكر أولا يا جدعان

وصيتي

عارفه ان ان شاء الله بكره 25 مش هيحصل حاجه ولا ضرب و كده
بس برضه حبيت أكتب وصيتي

أنا عايزه لبسي يتوزع على الناس الفقراء كل لبسي و جزم و كل حاجه

لو ليا أي فلوس في الورث أو الشقه أديها للفقراء
 

أنا عايزه اتبرع بعينيا الاتنين و بأعضاء من جسمي لمصابي الثوره

عايزه أهلي و صحابي يحاولوا يجمعوا أكبر عدد ممكن من الناس تصلي عليا

مش عايزه حد يصوت عليا ولا يعيط جامد و الكلام ده

عايزه تفتكروني دايما بالخير

عايزه تعملوا جروب تخشوا كل يوم تدعولي و تفكروا الناس انها تدعيلي و مش لازم جروب ليا لوحدي يبقه لكل الشهداء و الناس تخش تدعيلهم كل يوم

مسامحه كل حد ممكن يكون ضايقني و ياريت أي حد مضايقاه يسامحني

كلاكيت ثوره تاني مره

لأ مش هعلقها دلوقتي أصلها لسه مخلصتش

كنت بعد الثوره بيومين جبت فرخ لوح و رسمت حاجات عن الثوره و كتبت الشعارات اللي كنا بنقولها و حطيت صور الشهداء من جورنان المصري اليوم عشان كنت شايفه ان الشهداء دول لازم يفضلوا قدامنا علطول و مننساهمش أبدا.

رسمت و لزقت الصور و لونت  بس بقيت حته كده في اللوحه لسه فاضيه و مخلصتش اللوحه ..و أي حد يجيلي البيت من صحابي أفرجهم عليها و يقولولي الله ديه حلوه أوي علقيها.
كنت برد عليهم بالرد ده
" لأ مش هعلقها دلوقتي أصلها لسه مخلصتش"

كنت فاكره ان ناقص اللوحه شويه كلام تاني عن الثوره و تبقى خلصت ..مكنتش فاكره أبدا ان فعلا اللوحه مخلصتش عشان الثوره أصلا مخلصتش.. عشان فيه شهداء تاني لسه المفروض أحطهم جنب شهدا يناير..عشان برده أفتكرهم و منسهامش طول حياتي..لسه فيه أحداث كتير حصلت و بان فيها مواقف الأحزاب.. لسه فيه حاجات كتييير أوي محتاجه أغطي بيها الأوضه ألواح عشان أحكيها


أفتكرت اللوحه ديه النهارده.. طلعتها
 كنت حاطه في اللوحه حبه صور و حبه هتافات من اللي كنا بنقولها في الميدان

 !!لقيت صوره الدبابه و ظابط الجيش اللي بيلم على الناس و الناس ببصور معاه
لقيت في الهتافات اللي كتباها .. الجيش و الشعب أيد واحده

أحساس جوايا اني عايزه أقطع الصوره ديه و أشخبط على الهتاف ده
 :S:S
 حاجه تحزن و الله

 قعدت أبُص في اللوحه و أضحك على نفسي و كأني بقول لنفسي ..ياااه ده احنا اضحك علينا أو بمعنى تاني .. ضحكنا على نفسنا لما افتكرنا ان كده خلاص عملنا اللي علينا في ال 18 يوم و هدمنا الفساد
احنا اهو فاضل 28 يوم على عيد الثوره و الحاله زفت..(اللي الحكومه طبعا مش معترفه بيه)
اصلها بعيد عنكوا كده مش حكومه ثوريه ..مش عارفه ازاي

و عشان كده و عشان حاجات كتير أوي هننزل تاني يوم 25 يناير 2012
و هنهدم أم الفساد ده اللي متوغل في البلد ديه
و يا احنا يا هوه بقه

و على رأي وائل غنيم .. احنا اللي هنحبط الأحباط
ممكن نخلي ده شعارنا بجد في الفتره ديه

تسليم السلطه لرئيس مجلس الشعب
محاكمه قتله ماسبيرو و محمد محمود ومجلس الوزراء و المسؤول الأول عنه المشير طنطاوي و سامي عنان
مش عايزين محاكمات عسكريه لمدينين
الافراج عن معتقلي الرأي اللي في السجون و اللي محكوم عليهم عسكريا بعدد 12,000
تطهير القضاء و ده مهم فحت

هنرجع لل 3 حاجات اللي نزلنا بيهم أول يوم
عيش..حريه ..عداله اجتماعيه

تحديد حد أدنى و أقصى للأجور..و تحت حد أقصى ديه 60 ألف خط
حريه الرأي و التعبير تكون مكفوله لكل الناس و احترام كرامه الانسان المصري و حرمه جسده و (عرضه)و الالتزام بالقانون في التعامل مع المتظاهرين

فيه سؤوال يراودني بشده ..هوه الأخوان المسلمين بجد راضين عن نفسهم كده ؟؟..و طبعا هما لحد دلوقتي مأعلنوش انهم هيشاركوا في 25 اللي جايه !!..
أنا مش عارفه ايه الغرور اللي هما بقوا فيه ده ..هما فاكرين نفسهم انهم اللي نجحوا الثوره ؟؟..الثوره أولا منجحتش و لو نجح الجزء الأول منها ده بقه بسبب ربنا و  بعده المصريين جميعا

و لو الاخوان فاكرين ان هما اللي عملوا الليله ؟؟..طب مهما مرزوعين في مصر من 1928 معملوش ليه ثوره بقه ؟؟..و كان ساعتها محدش قدر يفتح بقه معاهم....

!!يبقه يتتكتموا بقه مش كل شويه يعدوا يقولوا احنا اللي حمينا  الثوره و احنا اللي هببنا..يا عم عيب عليكوا ده انتوا حته مستجرتوش تنزلوا في أول الثوره
انا مكنش ده رأي ابدا عنهم .. بس الأحداث عماله تثبتلي كده و أعلامهم المخزي عمال يثبت ده أكتر و اكتر سواء من جورنان أو من قناه 25

المهم دلوقتي ان الثوره ديه يا جدعان هتنجح غصب عن أي حد ان شاء الله .. يا رب خليك معانا يا رب

لسته العريس :P

احم احم 
بصوا بقه رفيق الكفاح ده لازم يبقه فيه شويه حاجات كده مهمه !!:]


أيام الثوره كان عندي لازم يبقه كان بيبات في التحرير على الأقل 3 أيام


دلوقتي بعد أحداث محمد محمود و مجلس الوزراء الموضوع أختلف حبتين 
:D :D هعع

1)طبعا لازم يكون نزل أيام الثوره و بات في التحرير

2)يكون متأثرش بخطاب مبارك التاني ولا عيط ولا الحركات النص كم ديه

3)يكون نزل موقعه الجمل

4)يكون  عمره ما نزل مظاهرات في العباسيه ولا هوب نحيتهم

5)يكون شملوا حبه حلوين من غاز محمد محمود بمقدار مثلا 3 أيام نزول بحد أدنى . و طبعا يكون شم من النوعين

6)يكون أعترض على أحداث مجلس الوزراء و نزل وقف قدام العسكر الأوباش

7)ميكونش قال على البنت اللي اتسحلت و اتعرت.. هي ايه اللي نزلها ولا هي ليه مش لابسه حاجه تحت العبايه

و جاري تحديث البوست ده على حسب اي حاجه جديده تحصل في الثوره اللي مش باينلها اخر ديه :D

يا خوفي :D

و طبعا النقط ديه فوق معتقداتي الأولييه عن الشخص اللي هكمل معاه حياتي (A)(A)


حاسه هاخد فوق دماغي في الاخر
(H)(H)

مله أهلكوا ايه ؟؟

انا مش لاقيه حاجه أقولها عن الاوسااااخ دول !!
!!..جيش و شرطه ولاد ستين كلب

و ربنا ياخد كل واحد قتل واحد من المتظاهرين و عذبهم
ربنا على الظابط و العسكري !!

انا مش عارفه أتكلم تعبت من الكلام
دهس و سحل و تعريه و قتل و ضرب !!! ايه بقه !!..مله أهلكوا ايه تعرو بنت و تضربوها بالطريقه المريضه ديه !!.. و تضربوا اللي
تيجي تساعدها بعد كده !!!.. و يسحلو ستات كبيره في السن و يضربوها

 البنت ديه قالولها طنطاوي ده سيدك !!   

  و حفرو حرف

T

على راسها أول حرف من طنطاوي الكلب !

تقتلوا الطفل و الشيخ و الأزهري و الطبيب و المهندس و خريج الاعلام !!
هما دول البلطجيه في وجهه نظركم
 !!

كل اللي اقدر اقوله !!.. حسبي الله و نعم الوكيل !!
الله أكبر و أعلى من الظابط و العسكري و كل ظالم فيكي يا بلد

و الله لننظفك يا بلد من ولاد الكلب دول

روحي هناك

"مش موافقه تنزلي التحرير يا سارة!!.. سامعه؟"

لأول مره ماما تقولي كده !!!.. نعم بقه!!..ده أنا كنت موجوده في موقعه الجمل و كنت موجوده في أسبوع محمد محمود  و بخش أساعد الناس لحد نص محمد محمود!!..مع علمها بالكلام ده كله و كانت بتكلمني و أنا في الطريق للتحرير و تقلي جددي نيتك لله يا سارة!!.. أشمعنى المره ديه ؟؟!!.. 

عرفت ليه طبعا !!.. عشان صوره البنت اللي اتعرت واجعاها !!.. و كل ما تفتكرها تُعد تعيط !!..متخيالاني مكانها

"لأ يا ساره لازم نهده بقه شويه كده و  ننزل  لما نبقه كتير و يبقه فيه نظام أنا مش مستعده تتاخدي و يحصل فيكي كده " 

يا ماما يا حبيبتي ماهما عايزين كده ان احنا نطاطي و نخاف !!.. و احنا مش هنخاف ابدا تاني بجد و لو مجبناش حق البنت ديه و حق الشيخ عماد و حق كل الشهداء و كل البنات و الستات اللي حصل عليهم انتهاكات .. يبقه منستحقش نعيش رافعين راسنا .. يبقه منستحقش نفرح أصلا  

و بعدين من امته يعني يا ماما؟؟.. ده انتي الام الشجاعه اللي بتفشخر بيها قدام كل صحابي انها بتوافق انزل و مبتعترضش و واثقه ان انا مكتوبلي هموت امته و ازاي !! 

المهم .. نقاش طويل طويل طويل بتكلم مع أمي و أخويا و مش راضيني أنزل !!!.. لقيت نفسي فجأه بعيط أوي !!.. بقول احنا بنتكلم في ايه !!.. الناس ديه لازم يتجاب حقها !!.. انا لازم اشارك في ده !!!.. و يحصلي اللي يحصلي بقه !!و لقيت نفسي بعيط جامد أوي اني مش هنزل التحرير .. دخلت عيطت شويه مع ان انا دمعتي أصلا نادره أوي ..و بيسموني معندهاش دم :]

رجعت تاني و احاول اتناقش تاني و تالت .!!.. لقيت مش موافقه برده !!..لقيت نفسي بعمل تصرفات خارجه عن ارادتي !! لقيت نفسي بخبط في الأرض .. و الدمع عماله تنزل علي خدي من غير اي احساس ولا تحكم فيها !!.. و قلتلها لأ ماهو مينفعش منزلش !!!.. مينفعش!!..

قلتلي يا ساره لو نزلتي انا مش راضيه عنك !!!!!

الصدمه !!

رحت شديت شنطه صاحبتي ساره و شنطتي !!.. يلا يا ساره 
أنا نازله يا ماما 
و جوايا صوت بيقولي ان انا نازله أقول كلمه حق في وجه سلطان جائر
و ان انا صح


نزلت بسرعه على السلالم و مشدتش الاسانسير عشان محدش يلحقني


صوت أخويا بيزعق 
سااااااااااره
تعاليييي 


صاحبتي وقفت قدامي و قلتلي ساره انتي عايزه تعملي فضايح في العماره ؟؟!!...و بعدين انتي هتنزلي و أمك مش راضيه عنك؟؟ ..ديه مش حاجه كويسه ابدا !!




رجعت و دخلت البيت و انهرت في العياط بطريقه مش طبيعيه !!!
صاحبتي كلمت واحده صاحبتي تانيه عشان تيجي تهديني و يخرجوني شويه من اللي فيه !!.. للدرجه ديه كانت حالتي خطيره ؟!! :] انا فعلا مكنتش حاسه بنفسي الدموع كانت بتنزل من غير ما احس عماله تنهمر و مقهوره من جوايا أوي أوييييي


صحابي خرجوني شويه طول ما انا قاعده ..مخنوقه .. و كل شويه أسأل صاحبتي اللي قاعده على تويتر .ز ايه أخبار الناي اللي في التحرير؟؟..كتير؟؟...طب الستات اللي في المسيره ؟؟.طب طلاب جامعه عين شمس؟؟..الناس كتيره؟؟


أول ما توريني صوره ان الناس كتير 
أعُد أقول الحمد للهههههههههههههه !!!!!..
كأني ولدت ولد ولا كسبت مليون جنيه ولا حاجه :]:]


و أفرح لما أسمع الكلام ده !!.. و أرجع أتحسر على حالي عشان مش معاهم 


أيقنت ساعتها ان روحي  مكنتش معايا !!..روحي هناك !!.. روحي في التحرير !!  


يا رب عديها على خير و خلصنا من أم مجلس العار ده والله ان شاء الله النصر قريب

هتاف و بكاء

هتاف و بكاء !!!!..ده اللي كان بيحصل امبارح السبت 17/12/2011
قبل الصلاه على الشهيد الشيخ عماد الدين عفت 



بعد ما صلينا الظهر قعدنا نهتف بحرقه يسقط يسقط حكم العسكر..لا اله الا الله .. الشهيد حبيب الله.. الشعب يريد اعدام المشير ..و في نفس الوقت كنا بنبكي لاستشهاد الشيخ عماد مع اني معرفوش بس حسيت اني اعرفه اوي و كأنه اتاخد مني و كنت حزينه عليه أوي كأني عارفاه كويس...كان هتاف بحرقه يصحبه بكاء

امام المسجد كان بيسكتنا كل ما نهتف و اخيرا راح مسكتنا بقراءه القران.. فيه ناس مسكتتش و قعدت تهتف برده في الساحه بس انا استحيت بصراحه و قلت لأ انا هعُد


المهم جه جثمان الشيخ الكريم و الامام (عرفت بعد كده انه على جمعه)


قالنا اسكتوا و اقعدوا  و اسمعوا.. قعد بقه يتكلم شويه عن الشيخ و بعدين راح قال لا نعرف من قتله :'( :'(كنا في الساحه أصلا بعد ما قال كده راح كلنا هيجنا بقه جامد اوي و قلنا يسقط يسقط حكم العسكر و دخلنا مكان المصلى ناحيه الامام و قعدنا... نهتف و نعيط و بعدين جيه شيخ أزهر ..الشيخ أنس السلطان ربنا يكرمه يا رب.. راح طلع هو وهتف الشعب يريد اعدام المشير و يسقط يسقط حكم العسكر..اول ما قال كده بقينا بنعيط جامد أوي من حزننا و بنهتف بحرقه شديده !! فرحنا قوي بيه بقه عشان شيخ أزهر يعني و قعدنا نهتف و نعيط تاني ;'( مش مصدقين الازهر بيعمل ايه !!!!! :S:S:S: كنا متوقعين منهم حركه او اي موقف ضد المجلس بعد ما اللي حصل لكن للأسف كان موقفهم مخزي:S

راح الشيخ على جمعه أوقفنا ببدأه للصلاه..صلينا العصر و بدين جه وقت صلاه الجنازه ..بعد الصلاه عليه .ستات كبار جنبي هما اللي بدأوا الهتاف.. يسقط يسقط حكم العسكر
و الناس كلها وراها و بعدين طلعنا بمسيره من جو الساحه لبره .. المسيره متوجه أولا لدفن الشهيد و بعد كده على التحرير


و احنا في الطريق عند السيده عيشه كده و بنشاور للناس اللي في العمارات ..يا اهلينا انضموا لينا .. لقينا ترحيب من الناس اوي .. و لقينا ست كبيره في البلكونه بتهتف بحرقه يسقط يسقط حكم العسكر ..فرحنا أوييي  و قعدنا نهتف وراها و سقفنالها وقعدنا نصفرلها بقه :]

  رحنا الدفنه و الشيخ أنس قالنا نصمت و ندعوا للشيخ تلت ساعه و بعدين مسيره للتحرير..عملنا كده فعلا عدينا على ميادين كتير واحنا في الطريق و اللي يقلك"ربنا يبارك فيكوا يارب انتوا انضف ناس في البلد" واللي يصقفلنا و يحينا و على الجانب التاني .. الي بيشاوروا لينا بحاجات و حشه و يشتمونا و "خربتوا البلد و بتاع "
عادي جدا كنا بنسكت و منردش عليهم ..و اللي بيتنرفز و عايز يروح نحيتهم يتخانق .. الشباب بيمسكوه و يهدوه 





والله نفس الروح بتاعه ايام الثوره الاولانيه و نفس الشباب معظمهم مش مسيسين و لا في أحزاب بقه ولا أي بتنجان ..مش فاضين طبعا عندهم أم الانتخابات  أهم من الدم اللي راح و من الشرف اللي راح


المهم قربنا من الميدان و أحساسي كأني راجعه بيتي و قربت أوصل كل ما نقرب
كل ما نقرب الميدان الهتاف بيزداد حرقه ..أول ما وصلت المسيره لقينا تشجيع جامد اوي بيحيونا عشان كنا كتير 


ثوار ..أحرار.. هنكمل المشوار
حريه ... حريه ...حريه
الجبان جبان و الجدع جدع واحنا يا جدع راجعين الميدان

هتافات قلناها بحرقه و بشده و بفرح من تجمعنا تاني بعد ما الصبح الميدان كان مفهوش حد خالص ..الجيش كان دخل الميدان و حرق
الخيام و فض الاعتصام بالكامل


حسبنا الله و نعم الوكيل في كل ظالم
يسقط يسقط حكم العسكر


لازم بقه الناس اللي في البيوت و اللي بتقول دول بلطجيه و .. يذكروا الحديث ده

 حديث رسول الله صلى الله عليه وسلم
عن كعب بن عجرة قال : خرج علينا رسول الله صلى الله عليه وسلم ونحن تسعة وبيننا وسادة من أدم أحمر , فقال : إنه سيكون بعدي أمراء فمن صدقهم بكذبهم وأعانهم على ظلمهم فليس مني ولست منه ولن يرد على الحوض , ومن لم يصدقهم بكذبهم ولم يعنهم على ظلمهم فهو مني وأنا منه وسيرد على الحوض.